സങ്കീര്‍ത്തനം:10

ഈശ്വരാ അവിടുന്ന് മാറി നില്‍ക്കുവതെന്ത്

കഷ്ടദിവസങ്ങളില്‍ മറഞ്ഞിരിപ്പതെന്ത്

പീഡിപ്പിച്ചിടുന്നിതാ ദുഷ്ടരെളിയവരെ

ചാടിവീഴുന്നവര്‍ മേല്‍ സിംഹങ്ങളെപ്പോലവര്‍

നാഥനെ ദുഷ്ടരവഗണിക്കുന്നു ഗര്‍വിനാല്‍

ദൈവമില്ലാത്തപോലെ പ്രവര്‍ത്തിച്ചിടുന്നവര്‍

ഏറ്റമഭിവൃദ്ധിപ്പെടുന്നു മേല്‍ക്കുമേലവര്‍

ദൈവത്തിന്‍ ന്യായവിധി കാണുന്നില്ല മുന്നിലായ്

വീമ്പ് പറയുന്നവര്‍: "കുലുങ്ങുകയില്ല ഞാന്‍

നേരിടുകയുമില്ല അനര്‍ത്ഥമെനിക്കേതും"

വായില്‍ നിറഞ്ഞിരിപ്പൂ ശാപവും വഞ്ചനയും

ഭീഷണിയുമതിക്രമങ്ങളും ദുഷ്ടതയും

ദുഷ്പ്രവൃത്തികള്‍ ദൈവം കാണുന്നില്ലെന്ന് നിന-

ച്ചവര്‍ മേല്‍ക്കുമേലവ പതിവായ്‌ ചെയ്തീടുന്നു.

എങ്കിലോ വാണീടുന്നു രാജാവായ് സര്‍വേശ്വരന്‍

ദുഷ്ടരെ ശിക്ഷിച്ചിടും തിന്മ ചെയ്യാത്തവിധം