സങ്കീര്‍ത്തനം : 21

നാഥാ അങ്ങേകിയതാകും വിജയത്തി-

ലേറ്റമാഹ്ലാദിച്ചിടുന്നു രാജന്‍

രാജന്റെയാഗ്രഹമങ്ങ് നിറവേറ്റി

യേകീ മഹത്താമനുഗ്രഹങ്ങള്‍

തങ്കക്കിരീടം ശിരസ്സിലണിയിച്ചു

ദീര്‍ഘായുസ്സും ദയയോടെ നല്‍കി

ഏകി രാജന്ന് മഹത്വവും മാനവു-

മാഹ്ലാദവും തവ സാന്നിധ്യത്താല്‍

അത്യുന്നതന്‍ തന്നചഞ്ചല സ്നേഹത്താല്‍

നിര്‍ഭയനായിരിക്കുന്നു രാജന്‍

ആശ്രയിക്കുന്നു രാജാവ് സര്‍വേശനില്‍

ശത്രുക്കളില്‍ നിന്ന് രക്ഷയേകും

രാജന്നെതിരായ് രിപുക്കള്‍ നിരൂപിക്കും

ദുഷ്പദ്ധതികള്‍ വിജയിക്കില്ല

എയ്യുമസ്ത്രങ്ങളവര്‍ക്ക് നേരെ നാഥ-

നോടിക്കും വേഗത്തില്‍ വൈരികളെ