സങ്കീര്‍ത്തനം: 27

ഈശ്വരനെന്റെ പ്രകാശമത്രേയെന്റെ

രക്ഷയത്രേ എന്നാധാരമത്രേ

സൈന്യമൊന്നെന്നുടെ നേരേയണഞ്ഞാലു-

മെന്നുള്ളമേതും ഭയപ്പെടില്ല

യുദ്ധമെനിക്കെതിരായി വന്നെന്നാലും

ജീവിച്ചിടും ഭയമില്ലാതെ ഞാന്‍

ഈശ്വരനോടൊരു കാര്യമപേക്ഷിപ്പേ-

നെന്നുള്ളത്തിന്നഭിലാഷമത്

സ്വര്‍ഗ്ഗീയ രാജധാനിയിലവിടുത്തെ

ദാസനായ് പാര്‍ക്കാനനുവദിക്കൂ

താവക സൌന്ദര്യം ദര്‍ശിക്കുവാന്‍ നിത്യം

താവക ഹൃത്തൊന്നറിഞ്ഞിടുവാന്‍

വൈഷമ്യം നേരിടും വേളകളില്‍ നാഥാ

അങ്ങയോടൊന്നിച്ച് യാത്ര ചെയ് വാന്‍

എന്നും ഞാനന്വേഷിക്കുന്നു തവ മുഖ-

മെന്നില്‍ നിന്നും മറഞ്ഞീടരുതേ

എന്നുടെ മാതാപിതാക്കള്‍ വെടിഞ്ഞാലു-

മെന്നെയവിടുന്ന് കൈവിടില്ല

എത്രയോ നല്ലവനെന്നുടെയീശ്വര-

നെന്ന് ഞാന്‍ നേരിട്ടറിഞ്ഞിടുന്നു

ഈശ്വരനില്‍ത്തന്നെ പ്രത്യാശ വയ്ക്കുവിന്‍

ധൈര്യമായ്തന്നെ വസിച്ചിടുവിന്‍