സങ്കീര്‍ത്തനം: 31

നാഥാ തൃപ്പാദേയഭയം പ്രാപിക്കുന്നേന്‍

ലജ്ജിതനാകാനിടവരല്ലേ

ഈശനഭയശിലയുമെന്‍ കോട്ടയും

നീതിപൂര്‍വ്വം വിധി ചെയ്യുവോനും

വേഗം വിടുവിക്കയെന്‍ പ്രാര്‍ഥന കേട്ട്

പാലിക്ക നേരാകും പാത കാട്ടി

ഞാനിപ്പോളറ്റവും കഷ്ടത്തിലായിതാ

മങ്ങിപ്പോയ് ദുഖത്താലെന്റെ കണ്‍കള്‍

ദേഹിയും ദേഹവുമേറെത്തളര്‍ന്നുപോയ്‌

ഞാനൊരു പൊട്ടിത്തകര്‍ന്ന പാത്രം!

എന്നയല്‍ക്കാര്‍ക്ക് പരിഹാസവസ്തു ഞാ-

നെന്‍ വൈരികള്‍ക്കൊരു നിന്ദാപാത്രം

എന്നെ വിട്ടോടിയകലുന്നു സ്നേഹിതര്‍

വിസ്മൃതനായ് മൃതനെന്ന പോല്‍ ഞാന്‍

മന്ത്രിക്കുന്നെന്നെക്കുറിച്ചെന്റെ വൈരിക-

ളേര്‍പ്പെടുന്നു ഗൂഢാലോചനയില്‍

എന്നെക്കുരുക്കാന്‍ കെണിവച്ചിട്ടുണ്ടവര്‍

സര്‍വത്ര ഭീഷണിയെന്റെ ചുറ്റും

എങ്കിലോ അങ്ങെന്നഭയമെന്നീശ്വരാ

തൃപ്പാദത്തില്‍ സ്വയമര്‍പ്പിക്കുന്നേന്‍

മാറ്റമില്ലാത്തയവിടുത്തെ സ്നേഹത്താല്‍

സംരക്ഷയീ ദാസനേകിയാലും

എന്‍ വൈരികളപമാനിതരാകട്ടെ

മൂകരായ്തീരട്ടെ പാതാളത്തില്‍

വ്യാജം പറയുവോര്‍ മൂകരായ്തീരട്ടെ

ശിക്ഷിതരാകട്ടഹങ്കാരികള്‍

എത്രയധികമായങ്ങയെ സ്നേഹിപ്പോര്‍-

ക്കങ്ങൊരുക്കീടുമനുഗ്രഹങ്ങള്‍

താവക സാന്നിധ്യം കൊണ്ട് മറച്ചിടും

വൈരികളില്‍ നിന്നുമങ്ങവരെ

ഈശനില്‍ നിന്നും തിരസ്കൃതനായിപ്പോ-

യെന്ന് നിനച്ചേന്‍ പരിഭ്രമത്തില്‍

എങ്കിലും ഞാന്‍ സഹായത്തിനായ് കേണപ്പോള്‍

കേട്ടെന്‍ നിലവിളിനാദമീശന്‍

ഭക്തരേ സര്‍വേശ്വരനെ സ്നേഹിക്കുവിന്‍

രക്ഷിച്ചിടുന്നങ്ങ് വിശ്വസ്തരെ

ഈശനെ കാത്തിരിക്കും ഭക്തരേ നിങ്ങള്‍

ദൌര്‍ബല്യം വിട്ട് ധൈര്യപ്പെടുക