സങ്കീര്‍ത്തനം 42

ആറിലേക്ക് പായുവാന്‍ കൊതിച്ചിടും മാന്‍പേട പോ-

ലീശ്വരായെന്നുള്ളമങ്ങേയ്കായി വാഞ്ഛിച്ചീടുന്നു

നാഥാ തവ സന്നിധിയില്‍ വന്നവിടുത്തെ മുഖ-

മൊന്നു കാണുവാനെപ്പോഴെനിക്കായീടും നല്‍പ്രഭോ

വൈരികള്‍ നിരന്തരം പരിഹസിച്ചിടുന്നെന്നെ

ചോദിക്കുന്നവരെന്നോടെവിടെപ്പോയ് നിന്നീശ്വരന്‍

ഓര്‍ക്കുന്നേന്‍ സങ്കീര്‍ത്തനങ്ങള്‍ തീര്‍ഥാടകരോടൊപ്പ-

മാലപിച്ച് താവകാലയത്തിലേക്ക് പോയത്

എന്തിനിത്രയേറെ ദുഖിച്ചീടുന്നുയെന്നാത്മാവേ

നാഥനില്‍ പ്രത്യാശ വയ്ക്ക, കീര്‍ത്തിക്ക തവനാമം

എന്നുള്ളമസ്വസ്ഥമായിരിക്കയാല്‍ നദീതീര-

ത്തും മലമുകളിലും സര്‍വേശനെ ധ്യാനിപ്പൂ ഞാന്‍

ദൈവത്തിന്നചഞ്ചലമാം സ്നേഹം ദര്‍ശിപ്പൂ പകല്‍

തന്നെ വാഴ്ത്തും കീര്‍ത്തനങ്ങളാലപിപ്പൂ രാത്രിയില്‍