സങ്കീര്‍ത്തനം 46

നാഥന്‍ നമുക്ക് ബലവുമഭയവും

കഷ്ടത്തിലേറ്റമടുത്ത തുണ

ഭൂമി കുലുങ്ങിയാലും കുന്നുകള്‍ പാടേ

ആഴിയില്‍ വീണാലും ഞാന്‍ ഭയക്കാ

നാശമില്ലാത്തൊരു പട്ടണമുണ്ടിഹെ

ആറൊന്നൊഴുകും നഗരമധ്യേ

ആ നഗരത്തില്‍ വസിക്കുന്നു സര്‍വേശ-

നീശ്വരന്‍ തന്‍ സ്വന്തപട്ടണം താന്‍

ഭൂമിയിലെല്ലായിടത്തും സര്‍വേശ്വരന്‍

യുദ്ധങ്ങളില്ലാതെയാക്കിടുന്നു

തീയിക്കിരയായിടുന്നു രഥങ്ങളും

കുന്തങ്ങളും പെരും വില്ലുകളും

താനരുളിച്ചെയ് വൂ: "ശാന്തരായീടുവിന്‍

ദൈവമാകുന്നു ഞാനെന്നറിക

കീര്‍ത്തിച്ചിടുന്നെന്നെയെങ്ങും ജനതകള്‍

ലോകമെങ്ങും പുകഴ്ത്തപ്പെടുന്നു"

ഉണ്ട് നമുക്കൊപ്പം സംരക്ഷയേകുവാ-

നേറ്റം ബലവാനാം സര്‍വേശ്വരന്‍

നല്ലൊരു രക്ഷാസങ്കേതമാകുന്നു താന്‍

യാക്കോബിന്‍ ദൈവമാം സര്‍വേശ്വരന്‍