സങ്കീര്‍ത്തനം 53

പാരിതിലെങ്ങുമേയില്ലൊരു ദൈവവു-

മെന്നല്ലോ മൂഢര്‍ നിനച്ചിടുന്നു

നന്മപ്രവൃത്തികള്‍ ചെയ്യുന്നില്ലൊട്ടുമേ

തിന്മയും മ്ലേച്ഛമാം നീതികേടും

മാത്രം പ്രവര്‍ത്തിച്ചു കൊള്ളരുതാത്തവ-

രായവര്‍ വര്‍ത്തിച്ചിടുന്നു നിത്യം

ഈശനെത്തേടുന്ന ബുദ്ധിമാന്മാരുണ്ടോ

യെന്നറിവാനായി സ്വര്‍ഗ്ഗേ നിന്നും

ഈശന്റെ നേത്രങ്ങള്‍ ഭൂമിയിലെമ്പാടും

നാള്‍ തോറും ശ്രദ്ധിച്ച് നോക്കിടുന്നു

ഇല്ല കാണ്മാനില്ല നന്മ ചെയ്യുവോരെ

യേവരുമൊന്നുപോല്‍ തിന്മ ചെയ് വൂ

അപ്പം ഭുജിക്കുന്ന ലാഘവത്തോടവ-

രെന്‍ ജനത്തെ തിന്നൊടുക്കിടുന്നു

എന്നാല്‍ ഭയന്ന് വിറകൊണ്ടിടുമവര്‍

സംഭ്രാന്തിയേറ്റമനുഭവിക്കും

തള്ളിക്കളയുമവരെ സര്‍വേശ്വര-

നസ്ഥികളെങ്ങും ചിതറപ്പെടും

സീയോനില്‍ നിന്നുമിസ്രായേലിന്‍ മോചനം

വന്നുകാണ്മാനാശയുണ്ടെനിക്ക്

പോയകാലത്തെയൈശ്വര്യമീശന്‍ വീണ്ടും

നല്‍കിടുമ്പോളാഹ്ലാദിക്കുമവര്‍