സങ്കീര്‍ത്തനം 55

കേട്ടാലുമെന്നുടെ പ്രാര്‍ഥന സര്‍വേശാ

യാചനയ്ക്കുത്തരമേകിയാലും

വേദനയാലെന്‍ ഹൃദയം പിടയുന്നു

എന്നുള്ളിലുണ്ട് മരണഭീതി

ഏറ്റം പെരുകിടുന്നക്രമികള്‍ നാട്ടില്‍

ദുഷ്ടര്‍ വിനാശം വിതച്ചിടുന്നു

പ്രാവുകള്‍ക്കുള്ളപോല്‍ രണ്ട് ചിറകുക-

ളെന്മേലുമുണ്ടായിരുന്നുവെങ്കില്‍

ഏറ്റം കൊടിയ കാറ്റൂതിടുമിന്നാട്ടില്‍

നിന്നും പറന്നങ്ങു മാറിയേനെ

കാര്യമാക്കില്ല ഞാന്‍ വൈരിയായീടുമൊ -

രാളിന്റെ നിന്ദയോ ധിക്കാരമോ

എന്നാല്‍ നിന്ദിച്ചതോ എന്നുറ്റസ്നേഹിത-

നൊപ്പമാരാധിച്ച കൂട്ടുകാരന്‍

ഉറ്റ തോഴര്‍ക്കെതിരായുയര്‍ത്തി കരം

ലംഘിച്ചവന്‍ സ്നേഹത്തിന്‍ കരാറും

വെണ്ണയെക്കാള്‍ മൃദുവായ് സംസാരിച്ചവ-

നുള്ളില്‍ വിദ്വേഷം നിറഞ്ഞിരുന്നു

സര്‍വേശ്വരനെ വിളിച്ചപേക്ഷിക്കുവേന്‍

രക്ഷയേകും നാഥന്‍ നിശ്ചയമായ്

കാലത്തുമുച്ചയ്ക്കും സന്ധ്യയ്ക്കുമെന്നും ഞാന്‍

കേണിടും സങ്കടമോര്‍ത്തുകൊണ്ട്

ഏല്‍പ്പിക്ക നിന്നുടെ ഭാരം സര്‍വേശനെ

താങ്ങും നിനക്കായവിടുന്നവ

ശിഷ്ടര്‍ പതറാനനുവദിക്കില്ല താന്‍

സംരക്ഷീടുമവരെ നാഥന്‍