സങ്കീര്‍ത്തനം 56

കാരുണ്യമെന്നോട് കാട്ടുകയീശ്വരാ

തൃക്കരം നീട്ടി രക്ഷിക്കുകെന്നെ

പീഡിപ്പിക്കുന്നെന്നെയെന്‍ വൈരികള്‍ സദാ

എന്നെച്ചവുട്ടി മെതിക്കുന്നവര്‍

ഏറെയാണെന്നോട് പോരാടീടുന്നവ-

രൊന്നായെനിക്കായ് പതിയിരിപ്പോര്‍

വീക്ഷിച്ചിടുന്നവരെന്നുടെ നീക്കങ്ങള്‍

തക്കം പാര്‍ക്കുന്നു വലയിലാക്കാന്‍

ആശ്രയം സര്‍വേശനില്‍ത്തന്നെ വയ്പതാല്‍

ഭീതിയെന്നോടടുക്കില്ലയൊട്ടും

വൈരികള്‍ക്കെന്ത്‌ ചെയ്യാനാകുമെന്നോട്

സംരക്ഷയീശ്വരനേകുന്നതാല്‍

എണ്ണിയിട്ടുണ്ടെന്‍ ദുരിതങ്ങളീശ്വരന്‍

സംഭരിച്ചിട്ടുണ്ടെന്‍ കണ്ണുനീരും

എന്‍ പക്ഷത്താണീശനെന്നറിയുന്നു ഞാ-

നാകയാല്‍ തന്നെ പ്രകീര്‍ത്തിക്കുവേന്‍

വീഴാതെയെന്നുടെ കാല്‍കളെ കാത്തീശന്‍

മൃത്യുവില്‍ നിന്നുമെന്‍ ജീവനെയും

താവക സന്നിധെ ജീവിക്കും നിത്യവും

ദൈവിക ജീവന്റെശോഭയോടെ