സങ്കീര്‍ത്തനം 59

വൈരികളില്‍ നിന്ന് രക്ഷിക്കയീശ്വരാ

ദുഷ്ടരില്‍ നിന്നും വിടുതലേക

എന്നെ വധിപ്പാന്‍ പതിയിരിക്കുന്നവ-

രൊന്നിച്ചെനിക്കെതിരായിയവര്‍

എന്‍ പക്കലുള്ളൊരു കുറ്റവും കൊണ്ടല്ല

യെന്നെയവര്‍ വേട്ടയാടുവത്

നായ്ക്കളെപ്പോലെ കുരച്ചവരുച്ചത്തി-

ലന്തിക്ക് ചുറ്റുന്നു പട്ടണത്തില്‍

മൂര്‍ച്ചയേറിയതാം വാക്കുകള്‍ കൊണ്ടവര്‍

പട്ടണത്തില്‍ ചൊരിയുന്നസഭ്യം

തീറ്റയ്ക്കായ് ചുറ്റിത്തിരിയുന്ന നായ്ക്കളെ-

പ്പോലവര്‍ ചുറ്റുന്നു പട്ടണത്തില്‍

തീറ്റ കിട്ടാഞ്ഞ് മുറുമുറുക്കും നായ്ക്ക-

ളെപ്പോല്‍ പുലമ്പുന്നവരസഭ്യം

സ്വന്തം വാക്കുകളവര്‍ക്കെതിരാകട്ടെ

വീഴട്ടവര്‍ കെണിയിലവയാല്‍

ഭൂതലത്തെ നീതിയോടെ സര്‍വേശ്വരന്‍

വാഴുന്നുവെന്നറിയേണമെങ്ങും

എന്നഭയമവിടുന്ന് സര്‍വേശ്വരാ

കീര്‍ത്തനങ്ങള്‍ ഞാനങ്ങേയ്ക്ക് പാടും

എന്നോട് കാരുണ്യമീശ്വരന്‍ കാട്ടുന്ന-

താല്‍ പാടുമെപ്പോഴും കീര്‍ത്തനങ്ങള്‍