സങ്കീര്‍ത്തനം: 26

നീതി നടത്തിത്തന്നാലുമെന്നീശ്വരാ

ജീവിക്കുവേന്‍ നിഷ്ക്കളങ്കനായി

എന്നെയവിടുന്ന് നന്നായ് പരിശോധി-

ച്ചെന്‍ ഹൃദയത്തെയുരച്ച് നോക്ക

മാറാത്ത താവക സ്നേഹത്തിലെന്നുടെ

ദൃഷ്ടികളെപ്പോഴും വച്ചിടുന്നു.

എന്നെ നയിക്കുന്നു തവ വിശ്വസ്തത

കൈകഴുകും നിഷ്ക്കളങ്കതയില്‍

കൂട്ട് കൂടുന്നില്ല വഞ്ചകരോട് ഞാന്‍

ദുഷ്ടസംസര്‍ഗ്ഗം വെറുക്കുന്നു ഞാന്‍

കാപട്യമുള്ളോരുമൊത്ത് ചേരില്ല ഞാന്‍

നീചരോടൊട്ടും സഖിത്വമില്ല

യാഗപീഠത്തെ പ്രദക്ഷിണം ചെയ്യുന്നേ-

നാലപിപ്പൂ തവ കീര്‍ത്തനങ്ങള്‍

സ്നേഹിച്ചിടുന്നു സര്‍വേശാ അവിടുന്ന്

വാസം ചെയ്തീടും മഹാലയത്തെ

പാപികള്‍ക്കും രക്തദാഹികള്‍ക്കുമൊപ്പം

തൂത്തെറിഞ്ഞീടരുതെന്നെ നാഥാ

ചെയ്യുന്നവര്‍ ദുഷ്കൃത്യങ്ങള്‍ കരങ്ങളാല്‍

കോഴയാലും നിറഞ്ഞിടുന്നവ

കാപട്യമില്ലാതെ ജീവിക്കുമെന്നും ഞാന്‍

കാരുണ്യം തോന്നി രക്ഷിക്കുകെന്നെ

ആശ്രയിക്കുന്നേന്‍ പതറാതെയീശനില്‍

നാഥനെ വാഴ്ത്തും മഹാസഭയില്‍