സങ്കീര്‍ത്തനം: 7

നാഥാ ശരണപ്പെടുന്നു ഞാനങ്ങയില്‍

വേട്ടക്കാരില്‍ നിന്ന് രക്ഷിക്കണേ

കീറും കടിച്ചവര്‍ സിംഹങ്ങളെപ്പോലെ-

യാരുമുണ്ടാകില്ല രക്ഷിക്കുവാന്‍

സ്നേഹിതരെച്ചതിച്ചിട്ടുണ്ട് ഞാനെങ്കില്‍

ദ്രോഹിച്ചിട്ടുണ്ടെങ്കില്‍ വൈരികളെ

പിന്തുടര്‍ന്നെന്നെപ്പിടിക്കട്ടെ വൈരികള്‍

നിര്‍ദ്ദയം മര്‍ദ്ദിച്ചു വീഴ്ത്തിടട്ടെ

ഏറ്റവും ക്രോധമോടീശായെഴുന്നേല്‍ക്ക

ന്യായം വിധിപ്പാനൊരുങ്ങിയാലും

സ്വര്‍ഗ്ഗോന്നതിയില്‍ നിന്നും വാഴുമീശനെ-

യേവരും താണുവണങ്ങിടട്ടെ

ഹൃത്തിന്നറകളെക്കണ്ടിടുമീശ്വരാ

സജ്ജനത്തിന്നൈശ്വര്യം നല്‍കുക

ദുര്‍ജനം ചെയ്തിടും ദുഷ്ടപ്രവൃത്തികള്‍-

ക്കന്തം വരുത്തണേ തമ്പുരാനേ

തിന്മയെ ഗര്‍ഭം ധരിച്ചവര്‍ വഞ്ചന

പേറി വ്യാജത്തിന് ജന്മമേകും

എന്നെ വീഴ്ത്താന്‍ കുഴിയൊന്നൊരുക്കുന്നവര്‍

വീഴുമവര്‍ തന്നെയക്കുഴിയില്‍