സങ്കീര്‍ത്തനം 69

ഈശ്വരാ രക്ഷിക്ക മുങ്ങിത്താഴുന്നു ഞാന്‍

താഴുന്നിതാ നിലയില്ലാതെ ഞാന്‍

പെട്ടുപോയീ ഞാന്‍ കൊടും കയത്തിന്നുള്ളില്‍

നീര്‍പ്രവാഹം ശക്തി നേടുന്നിതാ

നാവ് വരണ്ടു കരഞ്ഞ് തളരുന്നു

ഈശനായ് കാത്ത് മങ്ങുന്നു കണ്‍കള്‍

കാരണം കൂടാതെയെന്നെ ദ്വേഷിപ്പവ-

രെന്‍ തലയിന്‍ മുടിയിലധികം

കൂടപ്പിറപ്പുകള്‍ക്കന്യനായ്തീര്‍ന്നു ഞാ-

നാഹാരമായ് വിഷമേകുന്നവര്‍

നാട്ടിലെല്ലാം ഞാന്‍ സംസാരവിഷയമായ്

പാടുന്നു മദ്യപരെന്നെപ്പറ്റി

പ്രാര്‍ഥിക്കുന്നേനങ്ങയോട് സര്‍വേശ്വരാ

ചേറില്‍ താഴാതെന്നെ രക്ഷിച്ചാലും

ഏകണേയുത്തരമങ്ങേഹിതം പോലെ

കാരുണ്യവാനല്ലോ സര്‍വേശ്വരന്‍

ഞാന്‍ മൂലം ദൈവഭക്തരപമാനിത-

രാകരുതെന്നേറ്റമാഗ്രഹിപ്പൂ

പീഡിതനാണ് ഞാന്‍ ദുഖിതനാണ് ഞാന്‍

കാരുണ്യത്തോടെന്നെ രക്ഷിക്കുക

കേള്‍ക്കുന്നു നാഥന്‍ ദരിദ്രര്‍ തന്‍ യാചന

ദാസരായോരെയവഗണിക്കാ

സീയോനെ നിശ്ചയമങ്ങ് രക്ഷിച്ചിടും

പാര്‍ക്കുമവിടങ്ങേ സ്നേഹിക്കുവോര്‍

പാടിപ്പുകഴ്ത്തിടും സര്‍വേശ്വരനെ ഞാന്‍

താവക മാഹാത്മ്യം ഘോഷിക്കുവേന്‍

വാനവും ഭൂമിയും രണ്ടിലും പാര്‍ത്തിടു-

മേവരും കീര്‍ത്തിച്ചിടട്ടെയങ്ങേ