സങ്കീര്‍ത്തനം 81

രക്ഷകനായിടുമീശ്വരന്ന് നമു-

ക്കാനന്ദമോടെ സ്തുതിപാടിടാം

തപ്പ് കൊട്ടീടുവിന്‍, വീണയും കിന്നര-

വും മീട്ടി ഗീതങ്ങളാലപിപ്പിന്‍

കാഹളമൂതുവിനുല്‍സവവേളയില്‍

പൌര്‍ണമിയിലമാവാസിയിലും

ചൊല്ലി സര്‍വേശ്വരന്‍: "തോളുകളില്‍ നിന്ന്

നീക്കി ചുമട്, സ്വതന്ത്രരാക്കി

കേണപേക്ഷിച്ചതിവേദനയില്‍ നിങ്ങള്‍

വേഗത്തില്‍ രക്ഷിച്ചു നിങ്ങളെ ഞാന്‍

മറ്റ് ദൈവങ്ങള്‍ നിനക്കുണ്ടായീടരു-

തെന്ന പ്രമാണം കൈവിട്ടു നിങ്ങള്‍

പാലിച്ചിരുന്നെങ്കില്‍ നിങ്ങളോടൊപ്പം ഞാന്‍

നിന്നേകിയേനെ മഹാവിജയം

എങ്കിലോ ശ്രദ്ധിച്ചില്ലെന്‍ പ്രമാണം നിങ്ങ-

ളെന്നെയപ്പാടെയവഗണിച്ചു

അങ്ങനെ തന്നിഷ്ടത്തോടെ നടക്കുമെ-

ന്നുള്ള ദുശാഠ്യമനുവദിച്ചേന്‍

എന്നിഷ്ടം പാലിച്ച് നിങ്ങള്‍ നടന്നെങ്കില്‍

തോല്‍പ്പിച്ചേനെ ഞാന്‍ നിന്‍ വൈരികളെ

മേല്‍ത്തരമായിടും ധാന്യങ്ങളും തേനും

ഏറ്റം സമൃദ്ധിയായേകിയേനെ"